Çinin texnoloji nəhəngi "Alibaba" böyük dil modellərinin (LLM) öyrədilməsi xərclərini əhəmiyyətli dərəcədə azalda bilən innovativ metod hazırlayıb.
Oxu.Az xəbər verir ki, bu barədə "South China Morning Post" (SCMP) məlumat verib.
"ZeroSearch" adlanan yeni texnologiya şirkət tərəfindən xarici axtarış xidmətlərindən istifadəyə əsaslanan ənənəvi yanaşmalarla müqayisədə məlumatların toplanması xərclərini 88%-ə qədər azalda bildiyi iddia edilir.
Güclü süni intellekt modellərinin öyrədilməsi yüksək effektiv avadanlıq, böyük həcmdə məlumat və əhəmiyyətli maliyyə sərmayəsi də daxil olmaqla, böyük resurs tələb edir. Baha başa gələn mərhələlərdən biri çox vaxt axtarış sistemlərinə müraciət olunmasını tələb edən təlim "dataset"lərinin toplanması və hazırlanmasıdır.
"ZeroSearch"ün yanaşmasının mahiyyəti ondan ibarətdir ki, yeni modellərin hazırlanması üçün lazım olan məlumatların yaradılması şirkətin mövcud, yaxşı təlim keçmiş LLM-lərinə həvalə olunur. Bu modellər məlumatın axtarışı və toplanması prosesini effektiv şəkildə imitasiya edir, lakin bunu üçüncü tərəf API-lərinə daxil olmaq üçün ödəniş etmədən və ya xarici axtarış infrastrukturundan istifadə etmədən həyata keçirir.
Qeyd olunur ki, standart axtarış API vasitəsilə 64 min sorğunun işlənməsi tərtibatçılara 586.7 dollara başa gələ bilər. Eyni zamanda, eyni tapşırığı yerinə yetirmək üçün 14 milyard parametrli daxili AI modelindən istifadə etmək cəmi 70.8 dollara başa gəlir. Bu, hazırkı mərhələdə xərclərin səkkiz dəfədən çox azalmasına gətirib çıxarır.
