Dmitri Kiselyov Ermənistanın "Vesti Nedeli" verilişinə qəzəblənməsini şərh edib

"Rusiya bu gün" ("Rossiya Seqodnya") beynəlxalq informasiya agentliyinin direktoru Dmitri Kiselyov Rusiyanın Ermənistandakı səfiri Sergey Kopırkinin "Vesti Nedeli" verilişində səsləndirdiyi konkret hansı bəyanata görə Ermənistan XİN-ə çağırıldığını bilmədiyini açıqlayıb.

Oxu.Az xəbər verir ki, Dmitri Kiselyov bu barədə News.ru-ya açıqlamasında söyləyib.

D.Kiselyov vurğulayıb ki, hazırda şərh ediləcək bir şey yoxdur:

"Konkret hansı bəyanatın erməni qardaşlarımı incitdiyini başa düşə bilmirəm. Hələlik şərh ediləcək bir şey yoxdur", - deyə tanınmış jurnalist qeyd edib.

Xatırladaq ki, yanvarın 15-də Rusiyanın Ermənistandakı səfiri Sergey Kopırkin Ermənistan XİN-ə çağırılıb. Bu barədə Ermənistan XİN-in Mətbuat Xidməti məlumat yayıb. Bildirilib ki, buna səbəb cari il yanvarın 12-də Rusiyanın Ümumrusiya Dövlət Televiziya kanalında yayımlanan "Vesti nedeli" proqramında "Ermənistanın suverenliyi və ərazi bütövlüyünə qarşı süni şəkildə yaradılan narrativlər" olub. XİN-də səfirə müvafiq etiraz notası da təqdim edilib.