ABŞ-nin Mərkəzi Kəşfiyyat İdarəsi (MKİ) İsrailin Prezident Donald Trampa İrandan gələn təhlükə barədə təqdim etdiyi məlumatlara şübhə ilə yanaşıb. Məhz bu məlumata görə, o, iyulun əvvəlində Türkiyəni öz təyyarəsi ilə deyil, başqa bir hava gəmisi ilə gizli şəkildə tərk etmişdi.
Oxu.Az xəbər verir ki, bu barədə ABŞ xüsusi xidmət orqanlarının keçmiş və indiki əməkdaşlarına istinadən "The Washington Post" qəzeti məlumat yayıb.
Bildirilir ki, MKİ İsrail tərəfindən bildirilən İranın Donald Trampa qarşı sui-qəsd cəhdi təhlükəsinə şübhə ilə yanaşıb. Nəşrin məlumatına əsasən, kəşfiyyat idarəsinin analitikləri bu məlumatları inandırıcı hesab etməyib və bu barədə Vaşinqton administrasiyasının rəsmilərinə xəbər veriblər. Lakin qeyd olunur ki, Ağ Ev və ABŞ Məxfi Xidməti riskə getməmək qərarına gəlib və əlavə təhlükəsizlik tədbirləri görüblər.
Avqustun 10-da "The Washington Post" qəzetinin verdiyi məlumata görə, Tramp 7-8 iyul tarixlərində Ankarada keçirilən NATO sammitindən sonra prezident təyyarəsinə minib. Lakin bir neçə dəqiqə sonra onu gizli şəkildə ABŞ Hərbi Hava Qüvvələrinə məxsus "C-32A" təyyarəsinə keçiriblər. Amerika lideri Türkiyəni bu təyyarədə tərk edib, baxmayaraq ki, Vaşinqton administrasiyası onun öz hava gəmisində olduğunu iddia edirdi.
Məqalədə qeyd olunduğu kimi, potensial cinayətkarları çaşdırmaq məqsədi daşıyan bu əməliyyat Tramp üçün İranla bağlı real təhlükə ilə əlaqədar həyata keçirilib.
Avqustun 11-də Tramp təsdiqləyib ki, ABŞ Məxfi Xidmətinin və hərbçilərin tövsiyəsi ilə Türkiyəni öz hava gəmisi ilə deyil, başqa bir təyyarə ilə tərk edib.
Senatdakı bir neçə demokrat Vaşinqton administrasiyasından bu əməliyyatın təfərrüatlarını, eləcə də onun həyata keçirilmə səbəblərini açıqlamağı tələb edib.
