Xilasedicilər Sankt-Peterburqdan olan alpinistin cəsədini təxliyə ediblər.
Oxu.Az xəbər verir ki, bu barədə TASS agentliyi regional Fövqəladə Hallar Nazirliyinin (FHN) Baş İdarəsindən açıqlamasına istinadən məlumat yayıb.
"Xilasedici dəstə 1991-ci ildə anadan olmuş Sankt-Peterburq sakininin meyitini Azau düzənliyinə qədər endirərək, onu hüquq-mühafizə orqanlarının əməliyyat-istintaq qrupuna təhvil verib", - deyə qurumun açıqlamasında qeyd olunur.
Bu təxliyə əməliyyatını Rusiya FHN-ə məxsus Elbrus Yüksək Dağlıq Axtarış-Xilasetmə Dəstəsinin 12 nəfərlik heyəti icra edib.
Bundan öncə verilən məlumatlarda turistin Elbrus dağında hərəkət edərkən 5 100 metr yüksəklikdən yıxılaraq öldüyü bildirilirdi. Həmin şəxsin müvafiq qurumlarda qeydiyyatdan keçmədiyi təsdiqlənmişdi.
Xatırladaq ki, iyun ayında da Rusiyanın ən yüksək zirvəsi hesab edilən Elbrusa qalxmağa cəhd edən dörd turistin dağda köməksiz vəziyyətdə qalması barədə xəbər yayılmışdı. Həmin vaxt qrup Kabarda-Balkariyanın Elbrus rayonu ərazisində, 3 200 metr hündürlükdən xilasediciləri köməyə çağırmışdı.
