Ermənistan parlamentinin "Hayastan" fraksiyasının katibi Artsvik Minasyana ittiham irəli sürülüb və barəsində başqa yerə getməmək haqqında iltizam qətimkan tədbiri seçilib.
Oxu.Az Ermənistan KİV-nə istinadən xəbər verir ki, müxalif deputat jurnalistlərə açıqlamasında İstintaq Komitəsində ifadə verməkdən imtina etdiyini bildirib.
Deputat cinayət işini siyasi təqibin klassik nümunəsi adlandırıb. O, beynəlxalq məhkəmələrdə iddialar qaldırmaq niyyətindədir.
Minasyan və fraksiya rəhbəri Seyran Ohanyan bundan əvvəl deputat toxunulmazlığından məhrum ediliblər. Bu gün, həmçinin S.Ohanyan barəsində başqa yerə getməmək haqqında iltizam qətimkan tədbiri seçilib.
İttihama əsasən, Artsvik Minasyan 2016-2018-ci illərdə təbiəti mühafizə naziri vəzifəsində çalışarkən qanunsuz tikinti ilə bağlı məlumat verməli olsa da, bunu etməyib. Baş prokurorun sözlərinə görə, bu, istintaqın qarşısında əlavə çətinliklər yaradıb. Həmin malikanə sonradan ictimai istifadəyə keçməsi nəzərdə tutulan investisiya proqramına da daxil edilib.
