İrəvan Şəhər Ümumi Yurisdiksiya Məhkəməsi "Çiçəklənən Ermənistan" müxalifət partiyasının lideri, iş adamı Qaqik Sarukyanın həbs müddətini daha iki ay uzadıb.
Oxu.Az TASS-a istinadən bildirir ki, bu barədə vəkil Emil Xaçatryan məhkəmə binasının qarşısında jurnalistlərə məlumat verib.
Məlumata görə, istintaq iş adamını fırıldaqçılığa kömək etməkdə və xüsusilə külli miqdarda çirkli pulların yuyulmasında ittiham edir.
"Ermənistan məhkəməsi Sarukyanın həbs müddətini daha iki ay uzatdı. Biz bir daha bu işdə ədalətin olmadığına əmin olduq", - deyə vəkil etirazını bildirib.
Vəkil, həmçinin qeyd edib ki, qanunla müəyyən edilmiş müddət ərzində məhkəmənin qərarından yuxarı instansiyaya şikayət verəcəklər.
Xatırladaq ki, daha əvvəl Qaqik Sarukyan barəsində dələduzluq və çirkli pulların yuyulması ittihamları üzrə iki ay müddətinə həbs qətimkan tədbiri seçilmişdi.
