Ermənistan İstintaq Komitəsi "Çiçəklənən Ermənistan" Partiyasının lideri, iş adamı Qaqik Tsarukyanın malikanəsində aparılan axtarış zamanı şəxsi zooparkdakı heyvanları və ov qənimətlərini müsadirə edib.
Oxu.Az xəbər verir ki, bu barədə Ermənistan İstintaq Komitəsinin mətbuat xidməti məlumat yayıb.
* Qaqik Tsarukyan saxlanıldı - VİDEO
Qurumun açıqlamasında bildirilib ki, müsadirə olunan əşyalar maddi sübut kimi tanınıb. İlkin hesablamalara görə, qanunsuz ov nəticəsində ətraf mühitə 30 milyon dram (təxminən 138 788 manat) məbləğində ziyan dəyib. Bəyanatda qeyd olunur ki, Tsarukyana məxsus zooparkdakı digər heyvanların da müsadirə edilməsi nəzərdə tutulur.
İstintaq Komitəsi həmçinin bildirib ki, 2022-2024-cü illər ərzində Tsarukyanın rəhbərlik etdiyi mütəşəkkil qrup külli miqdarda dələduzluq edib və qanunsuz yolla əldə olunan vəsaitləri leqallaşdırıb. İddialara görə, qrup üzvləri İran vətəndaşlarına məxsus 22 milyon ABŞ dollarından çox vəsaiti mənimsəyərək qanunsuz yollarla nağdlaşdırıblar. Həmçinin, qrupun Ermənistana avtomobil, texnika və yanacaq idxalı məqsədilə bir sıra şirkətlər təsis etdikləri bildirilir.
Qeyd edək ki, bir müddət əvvəl də Qaqik Tsarukyanın evində axtarış aparılmışdı.
