Əsədin dayısı oğlu: "Suriyada yeni silahlı birləşmələr yaradılacaq"

Suriyanın keçmiş prezidenti Bəşər Əsədin dayısı oğlu, iş adamı Rami Məxluf "elitar qüvvələr"in yaradılacağını elan edib.

Oxu.Az xəbər verir ki, bu barədə R.Məxluf öz "Facebook" hesabında məlumat paylaşıb.

İş adamının sözlərinə görə, qüvvələrin məqsədi devrilmiş prezidentin ailəsinin mənsub olduğu ələvələri - etnokonfessional azlığı qorumaqdır.

R.Məxluf qeyd edib ki, 150 min döyüşçüdən ibarət silahlı birləşmələr yaratmaq niyyətindədir (Suriyada 2.5 milyona yaxın ələvi yaşayır - red.).

İş adamı həmçinin Rusiyadan azlığın yaşadığı bölgələrə - Suriyanın şimal-qərbindəki Əl-Laziqiyyə və Tartus əyalətlərinə himayədarlıq etməsini istəyib.

Eyni zamanda o, ölkənin keçmiş prezidentini "saxta aslan" adlandırıb və onu "Suriyanın süqutu"nda ittiham edib.