Baş nazir Fransua Bayru Milli Assambleyada (parlamentin Aşağı Palatası) hökumətə etimad səsverməsi zamanı kifayət qədər sayda deputatın dəstəyini ala bilmədikdən sonra Fransa vətəndaşlarının əksəriyyəti parlamentin buraxılmasını dəstəkləyir.
Oxu.Az-ın xəbərinə görə, bunu Fransanın İctimai Rəy İnstitutunun (IFOP) LCI telekanalının sifarişi ilə keçirdiyi sorğunun nəticələri göstərir.
Belə ki, respondentlərin 61%-i Milli Assambleyanın buraxılmasını və növbədənkənar parlament seçkisini dəstəkləyib. Bu, iyulun 4-də keçirilmiş analoji sorğunun nəticələrindən 11% çoxdur.
"Bu, olduqca diqqətəlayiqdir, çünki prezident seçkisində Emmanuel Makrona səs verənlər istisna olmaqla, əksər kateqoriyalarda bu fikir üstünlük təşkil edir", - IFOP-un ictimai rəy şöbəsinin rəhbəri Frederik Dabi telekanalın efirində bildirib.
Sorğunun nəticələrinə görə, növbədənkənar seçkinin keçiriləcəyi təqdirdə sağçı Milli Birlik Partiyası səslərin əksəriyyətini ala bilər; respondentlərin 34%-ə qədəri onu dəstəkləməyə hazırdır.
Xatırladaq ki, sentyabrın 8-də Fransa Milli Assambleyasının (parlamentin Aşağı Palatası) deputatlarının əksəriyyəti baş nazir Fransua Bayrunun proqram xarakterli çıxışından sonra ölkə hökumətinə etimadın əleyhinə səs verib.
