Türkiyədə 13 vilayəti əhatə edən və 2 min polis əməkdaşının cəlb olunduğu genişmiqyaslı əməliyyat nəticəsində beynəlxalq narkotik şəbəkəsi ifşa edilib, 47 şübhəli saxlanılıb. Qruplaşmanın fəaliyyətində qadınlar da yer alıb, onlar "Baronessa" və "Abla" ayamaları ilə tanınıblar.
Oxu.Az-ın məlumatına görə, təşkilat Türkiyə, Almaniya, Niderland, İran və Şimali Makedoniyada fəaliyyət göstərib.
Şəbəkə Avropadan gətirilən xammaldan İranda heroin istehsal etdirib, narkotikləri qatırlarla Türkiyəyə keçirib, daha sonra Avropaya göndərib. "Abla" ləqəbli G.D. narkotiklərin saxlanılmasını,"Baronessa" kimi tanınan N.A. isə onların Avropa ölkələrinə daşınmasını təşkil edib.
İstintaqa əsasən, şübhəlilər ümumilikdə 10 ton 100 kiloqram narkotik vasitənin dövriyyəsi ilə əlaqələndirilir. Əməliyyat çərçivəsində 7 milyard 657 milyon lirə dəyərində bank hesabları və kriptovalyutalar, 556 daşınmaz əmlak, 155 avtomobil və 71 şirkətdəki paylara həbs qoyulub.
