İmran Xan ikinci dəfə Nobel Sülh Mükafatına namizəd göstərildi

Pakistanın keçmiş baş naziri, ən böyük müxalifət partiyası olan "Ədalət Hərəkatı"nın qurucusu İmran Xan "Pakistan World Alliance" (PWA) hüquq müdafiə təşkilatı tərəfindən Nobel Sülh Mükafatına namizəd göstərilib.

Oxu.Az-ın verdiyi məlumata görə, bu barədə təşkilatın saytında bəyan edilib.

"Biz İmran Xanı Pakistanda insan hüquqlarının və demokratik dəyərlərin müdafiəsinə verdiyi töhfəyə görə Nobel Sülh Mükafatına namizəd göstərdik", - deyə sənəddə vurğulanır.

İmran Xan ikinci dəfədir ki, bu nüfuzlu mükafata namizəd göstərilir. 2019-cu ildə o, Hindistanla münasibətlərdə hərbi gərginliyin azaldılması istiqamətindəki səylərinə görə Pakistanda Nobel Sülh Mükafatına namizəd göstərilmiş və o zaman ölkə parlamentinə onun namizədliyinin dəstəklənməsi barədə qətnamə təqdim edilmişdi. Lakin Xan Nobel Mükafatına layiq olmadığını bildirmiş və qeyd etmişdi ki, bu mükafatı "Pakistan-Hindistan mübahisəsinin Kəşmir məsələsi üzrə yekun həllinə nail olan və subkontinentdə sülhə yol açan" siyasətçi almalıdır.

İmran Xan 2018-2022-ci illərdə Pakistanın Nazirlər Kabinetinə rəhbərlik edib. O, 10 aprel 2022-ci ildə parlamentdə ona qarşı etimadsızlıq votumu nəticəsində vəzifəsindən uzaqlaşdırılıb. Siyasətçi 2023-cü ildən etibarən hakimiyyətdən sui-istifadə və korrupsiya ittihamı ilə 14 illik həbs cəzası çəkir.