Tələbatın azalması və ABŞ tərəfindən təzyiqlərin artması fonunda İran neftinin Çinə tədarükü kəskin şəkildə aşağı düşüb.
Oxu.Az "Bloomberg" agentliyinə istinadən xəbər verir ki, İranın Çinə gündəlik neft ixracı 1.8 milyon bareldən (fevralda) təqribən 160 min barelə (mayda) qədər azalıb.
Agentlik qeyd edir ki, bu tədarüklər İran iqtisadiyyatına həyati əhəmiyyətli dəstək hesab olunurdu.
Bunun səbəblərindən biri Çinin müstəqil neft emalı zavodları tərəfindən alışların azaldılmasıdır. Müəssisələr artan zərərlərlə üzləşib və neft emalı həcmlərini kiçiltməyə başlayıblar. ABŞ-nin tətbiq etdiyi sanksiyalar da əlavə təzyiq yaradıb.
Nəşrin məlumatına görə, ABŞ-nin məhdudiyyətlərinə məruz qalma riski üzündən bəzi çinli alıcılar İran xammalının tədarükünə daha ehtiyatla yanaşmağa başlayıblar.
Çatdırılma ilə bağlı yaranan problemlər də vəziyyəti çətinləşdirir. "Vortexa" konsaltinq şirkətinin məlumatlarına əsasən, iyun ayı ərzində Hörmüz boğazından İran nefti daşıyan heç bir tanker keçməyib.
"JTD Energy Services" şirkətinin rəsmisi Con Driskoll agentliyə bildirib ki, İran və Çin arasında neft ticarəti bütün dövrlərin ən ciddi sınağı ilə üzləşib.
Mütəxəssislər vurğulayırlar ki, Çin İrandan tədarükün azalmasını digər satıcıların hesabına kompensasiya edə bilər.
Qeyd olunur ki, son vaxtlar ucuzlaşan Rusiya nefti çinli alıcılar üçün daha cəlbedici hala gəlib. Mayda Çin lideri Si Cinpinlə aparılan danışıqların yekunlarına əsasən, Rusiya Prezidenti Vladimir Putin ölkəsinin Çinə neft və qazı fasiləsiz olaraq tədarük edəcəyini açıqlayıb.
