İspaniyada aprelin 28-də baş verən genişmiqyaslı elektrik kəsintisindən sonra istehlak 99.16% bərpa olunub.
Oxu.Az-ın TASS-a istinadən məlumatına görə, bu barədə enerji şəbəkələrinin operatoru "Red Electrica" xəbər yayıb.
Bildirilir ki, hazırda İspaniyada enerji istehlakı 21.265 MVt həcmində istehsala uyğun vəziyyətdədir.
İspaniya Daxili İşlər Nazirliyi elektrik şəbəkəsinin fəaliyyətində baş vermiş genişmiqyaslı kəsintidən sonra fövqəladə vəziyyət elan edib.
Bu barədə Oxu.Az "Reuters" agentliyinə istinadla xəbər verir.
Bildirilib ki, fövqəladə rejim yalnız aidiyyəti üzrə müraciət edən regionlarda qüvvədə olacaq.
Artıq Madrid, Əndəlüs və Estremadura bölgələrinin bu rejimin tətbiqi ilə bağlı hökumətə rəsmi müraciət etdikləri qeyd olunub.
"İspaniyada elektrik kəsintisinin bərpası 6-10 saat vaxt ala bilər.
Oxu.Az-ın "Reuters"ə istinadla verdiyi məlumata görə, bu barədə "Red Electrica" operatorunun rəhbəri Eduardo Prieto bildirib.
O vurğulayıb ki, şirkət baş verənlərin səbəbləri barədə spekulyasiya edə bilməz.
Bundan əvvəl bildirilmişdi ki, İspaniya və Portuqaliyanın enerji sistemləri genişmiqyaslı nasazlıqdan sonra 10 giqavatdan (GVt) çox güc itirib. Həmçinin məlum olub ki, Portuqaliyanın elektroenergetika idarəsi ölkənin bir hissəsində elektrik təchizatının bərpasına başlayıb.
İspaniyanın bütün ərazisində elektrik enerjisi təchizatında kəsinti qeydə alınıb.
Oxu.Az xəbər verir ki, bu barədə "El Pais" nəşri məlumat yayıb.
Bildirilib ki, elektrik təchizatındakı problem yalnız İspaniya ilə məhdudlaşmayıb, Portuqaliya, Yunanıstan və Fransanın bəzi bölgələri də bundan təsirlənib.
Verilən məlumata görə, bu vəziyyət bəzi yerlərdə bir neçə dəqiqə, bəzi bölgələrdə isə bir neçə saata qədər davam edib. Hazırda İspaniya hökuməti baş verən hadisənin səbəblərini araşdırır.
Elektrik şəbəkəsinə nəzarət edən dövlət şirkəti "Red Electrica" sosial şəbəkələrdə fövqəladə bərpa planını işə saldığını və digər enerji şirkətləri ilə əməkdaşlıq etdiyini açıqlayıb.
Elektrik kəsintisi nəticəsində Madridin Baraxas beynəlxalq hava limanının fəaliyyəti müvəqqəti dayandırılıb. Eyni zamanda, Sevilya, Barselona və Pamplona şəhərlərində işıqlar sönüb, Valensiya və Madridin metro xətləri fəaliyyətini dayandırıb.
Milli Kibertəhlükəsizlik İnstitutu insidentin haker hücumu nəticəsində baş verib-vermədiyini araşdırır.
