İsveçrənin Vale kantonunda qopmuş buzlaq parçalarının dağıntılarının təmizlənməsi təxminən altı ilə yaxın vaxt apara bilər.
Oxu.Az xəbər verir ki, araşdırmanı "20 Minuten" portalı dərc dib.
Belə ki, Alp dağlarında qopmuş torpaq və qaya parçası Blatten kəndinin 3 milyon kubmetr ərazisinə yayılıb. Beləliklə, əgər təmizlik işlərinə 25 ton ağırlıqda yükdaşıyan maşın cəlb olunarsa, nəqliyyat vasitəsinin ərazidə 200 min dəfə reys etməsi tələb olunur.
Gəlinən nəticəyə görə, 100 yük maşını davamlı olaraq vadidən qaya və torpaq çıxarsa, bu, 5 il 9 aya qədər çəkəcək. Hələlik İsveçrə rəhbərliyi bərpa işlərinin müddəti ilə bağlı təxminlər verməyib.
Qeyd edək ki, daha əvvəl İsveçrə KİV-in verdiyi xəbərə görə, mayın 28-də Alp dağlarında qopmuş buzlaq və palçıq axını 300 nəfərin yaşadığı Blatten kəndinin böyük hissəsini dağıdıb. Yerli hakimiyyət orqanlarının nümayəndəsi Mattias Ebener hadisə zamanı ən azı bir nəfərin itkin düşdüyünü bildirib. Mayın 19-da geoloji xidmətin uçqun ola biləcəyi barədə xəbərdarlığından sonra kəndin əhalisi təxliyə edilib.
