"Əksər it sahibləri sümüyün dördayaqlı dostları üçün təbii və faydalı qida olduğunu düşünürlər. Lakin reallıqda bu məhsul ev heyvanlarının sağlamlığı üçün ən ciddi təhlükə mənbələrindən biri hesab olunur".
Oxu.Az xəbər verir ki, bu təhlükə barədə rusiyalı baytar Yevgeni Davıdov "Gazeta.ru" nəşrinə müsahibəsində xəbərdarlıq edib.
Mütəxəssisin sözlərinə görə, bişmiş sümüklər tez bir zamanda iti qırıntılara bölünür ki, bu da dişlərin zədələnməsinə, eləcə də daxili orqanlarda yırtıqların və yaraların yaranmasına gətirib çıxarır. Belə xəsarətlər əksər hallarda cərrahi əməliyyat tələb edir və heyvanın həyatı üçün böyük risk yaradır. Bütöv sümüklər isə mədə-bağırsaq traktında ilişərək bağırsaq keçməzliyinə, kəskin ağrıya, qusmaya və hətta qanın zəhərlənməsinə (sepsis) səbəb ola bilər. Çiy sümüklər isə öz növbəsində həzm sistemini pozan və müxtəlif infeksiyalar yaradan təhlükəli bakteriyalarla doludur.
Baytar həkimlər sümükləri daha təhlükəsiz vasitələrlə - xüsusi çeynəmə oyuncaqları və itlər üçün nəzərdə tutulmuş faydalı çərəzlərlə əvəzləməyi məsləhət görürlər. Bu alternativlər heyvanın sağlamlığına zərər vurmadan onun çeynəmə ehtiyacını tamamilə ödəyir.
"Diş minasını möhkəmləndirən xüsusi yumşaq ət çərəzləri, çeynəmə çubuqları və digər qəlyanaltılar ideal seçimdir. Onlar orqanizm tərəfindən asanlıqla mənimsənilir və mədə-bağırsaq sistemində qıcıqlanma yaratmır", - deyə mütəxəssis əlavə edib.
