"Kalaşnikov" konserni "AK-12" avtomatının iki yeni modifikasiyasını hazırlayıb

Rusiyanın "Kalaşnikov" konserni AK-12 avtomatının iki yeni modifikasiyasını hazırlayıb.

Oxu.Az-ın məlumatına görə, bu barədə konsernin mətbuat xidməti xəbər verib.

Bildirilir ki, 17-21 fevral tarixlərində Əbu-Dabidə keçiriləcək "IDEX-2025" beynəlxalq silah və müdafiə texnologiyaları sərgisində konsern ilk dəfə "AK-12" avtomatının iki yeni modifikasiyasını - qısaldılmış ("AK-12K") və kiçik qabaritli ("AK-12SK") versiyalarını təqdim edəcək. Hər iki modifikasiya 5.45x39 mm patronu üçün hazırlanıb və düşmənin canlı qüvvəsinin məhv edilməsi üçün nəzərdə tutulub. Onlar müasir döyüşün tələblərinə cavab verən təkmilləşdirilmiş texniki, erqonomik və istismar xüsusiyyətlərinə malikdir. Maqazinin tutumu 30 patrondur və komplektə səssiz atəş cihazı daxildir.

"AK-12K" döyüş vəziyyətində 810 mm uzunluğa və 3.4 kq çəkiyə malikdir, "AK-12SK" isə daha kompaktdır - onun uzunluğu 750 mm, çəkisi isə 3.2 kq-dır.

Qeyd etmək lazımdır ki, "AK-12" artıq xüsusi əməliyyatda istifadə təcrübəsinə əsasən modernizasiya edilib. 2023-cü ilin mayında təqdim edilən yenilənmiş versiyada dioptrik nişangah və qundaq təkmilləşdirilib, atəş idarəetmə sistemi ikitərəfli olub, lülə qurğusu isə çıxarılmayan olub. Bundan əlavə, konstruksiyanı mürəkkəbləşdirən, lakin effektivliyi əhəmiyyətli dərəcədə artırmayan iki atəşli kəsmə rejimi aradan qaldırılıb.