Danimarkanın "Denmarkification" təşəbbüs qrupu Donald Trampın Qrenlandiyanı ABŞ-yə birləşdirmək cəhdinə cavab olaraq krallığa Kaliforniya ştatını satınalmağı təklif edib.
Oxu.Az-ın xəbərinə görə, bu barədə "Politico" nəşri məlumat verib.
Məlumata görə, kampaniyanın təşəbbüskarı Ksavye Dyutua nəşrə bildirib ki, Kaliforniya bir trilyon dollara başa gələcək.
Onun fikrincə, ABŞ ilə təmaslar konstruktor istehsalçısı olan "Lego"nun nümayəndələri tərəfindən aparılmalıdır, çünki çatışmayan parçalara görə əsəbiləşən uşaqlarla ünsiyyət onları danışıqlar sahəsində mütəxəssis edib.
Kaliforniyanın satınalınması üçün vəsaitin "kraudfandinq" (kütləvi maliyyələşdirmə) yolu ilə toplanması təklif olunur.
"Hər bir danimarkalıya cəmi 200 000 kron düşür", - deyə "Denmarkification"un saytında bildirilib.
Qrup indiyədək nə qədər pul toplandığını açıqlamır, lakin qeyd edir ki, ştatın Danimarkanın tərkibinə daxil edilməsinə dair petisiyanı artıq 198 mindən çox insan imzalayıb. Təşəbbüsün müəllifləri hesab edirlər ki, Tramp Kaliforniyanı satmağa razı olacaq, çünki o, ştatın "elə də böyük pərəstişkarı" deyil və onu dəfələrlə ölkədə "ən dağılmış şəhər" adlandırıb.
Xatırladaq ki, Tramp yanvarın 7-də Qrenlandiyanın ABŞ-yə qoşulmalı olduğunu deyib. O, Danimarkanın adadan imtina etməyəcəyi təqdirdə, ölkəyə qarşı yüksək ticarət rüsumları tətbiq edəcəyi ilə hədələyib. Hətta ilk prezidentlik dövründə (2017-2021) Tramp Qrenlandiyanı almağı təklif edirdi. O vaxt olduğu kimi, Danimarka və Qrenlandiya hakimiyyəti bu ideyanı rədd ediblər.
Qeyd edək ki, Qrenlandiya muxtar ərazi kimi Danimarkanın tərkibinə daxildir. 1951-ci ildə Vaşinqton və Kopenhagen NATO üzrə müttəfiqlik öhdəliklərinə əlavə olaraq müqavilə imzalayıblar. Buna uyğun olaraq, ABŞ adanı təcavüzdən qorumaq öhdəliyini öz üzərinə götürüb. Burada raket hücumu xəbərdarlığı sisteminin tapşırıqlarını yerinə yetirən ABŞ-nin "Pituffik" kosmik bazası yerləşir.
