"Meta Platforms" şirkəti İtaliyanın AGCOM tənzimləyici qurumunun məqalələrin fraqmentlərindən istifadəyə görə naşirlərə kompensasiya ödənilməsi barədə qərarından verdiyi şikayət üzrə məhkəmə prosesində məğlub olub.
Oxu.Az xəbər verir ki, bu barədə Avropa İttifaqı Ədalət Məhkəməsinin rəsmi sənədində qeyd olunub.
Xatırladaq ki, aprel ayının sonlarında İtaliyanın rabitə tənzimləyicisi olan AGCOM Avropa Komissiyasına müraciət edərək "Google"un süni intellekt əsaslı axtarış funksiyalarının yoxlanılmasını tələb etmişdi.
"Məhkəmənin qənaətinə görə, naşirlərin ədalətli təzminat tələb etmək hüququ Aİ qanunlarına tam uyğundur. Lakin bir şərtlə ki, bu cür ödənişlər onların materiallarından onlayn mühitdə istifadəyə verilən icazənin müqabilində həyata keçirilsin", - deyə məhkəmə rəyində vurğulanır.
Bununla yanaşı, kütləvi informasiya vasitələri öz məzmunlarından istifadəyə qadağa qoymaq və ya materialların ödənişsiz şəkildə yayılmasına icazə vermək hüququnu özlərində saxlamalıdırlar.
Qəbul edilmiş qərarda o da bildirilir ki, kommersiya azadlığının bu cür məhdudlaşdırılması tam əsaslıdır. Belə ki, bu addımlar müəllif hüquqları sahəsində ədalətli rəqabət bazarının formalaşmasına xidmət edir və nəşriyyatlara xəbər məzmununun yaradılması üçün ayırdıqları sərmayələri geri qaytarmağa imkan yaradır.
Qeyd edək ki, süni intellekt tətbiqlərinin və çatbotların, o cümlədən milyarder İlon Maska məxsus "Grok" platformasının fəaliyyəti son dövrlərdə qadınların və uşaqların intim xarakterli təsvirlərini generasiya etmələri barədə yayılan çoxsaylı xəbərlərdən sonra ciddi qalmaqallarla müşayiət olunub.
