NATO parçalana bilər: Avropada Trampın hərəkətləri ilə bağlı təşviş başlayıb

ABŞ Prezidenti Donald Trampın Krımın Rusiya kimi tanınması təklifi Şimali Atlantika Müqaviləsi Təşkilatının (NATO) parçalanmasına səbəb ola bilər.

Oxu.Az xəbər verir ki, bu barədə Almaniyanın "Berliner Zeitung" qəzeti məlumat verib.

"NATO sınaqdan keçəcək. NATO-nun qarşıdan gələn sammiti müdafiə xərcləri ilə bağlı olmalı idi - indi o, Ukrayna ilə bağlı açıq mübahisə meydanına çevrilmək təhlükəsi ilə üz-üzədir", - deyə nəşr qeyd edib.

Məlumata görə, Trampın Ukrayna ilə bağlı siyasəti Avropa İttifaqını (Aİ) dalana dirəyib: bir tərəfdən Kiyevi dəstəkləməyə davam etmək, digər tərəfdən Vaşinqtona sədaqətini qorumaq istəyi.

Avropa Şurasının xarici əlaqələr üzrə eksperti Ceremi Şapironun sözlərinə görə, Ukrayna məsələsində bağlayıcı rolunu oynayan ABŞ olub. Əgər Vaşinqton müqavilədən çıxmaq qərarına gəlsə, Aİ dövlətlərinin birliklərini davam etdirməsi çox çətin olacaq.

"Transatlantik münasibətlərdə ciddi böhran başlayıb. Avropa ABŞ ilə müttəfiqliyini tamamilə itirmədən Ukraynanı dəstəkləməyə davam etməyin yolunu axtarır", - deyə məqalədə vurğulanıb.