İsrailin Baş naziri Benyamin Netanyahu Vaşinqtonda (ABŞ) iki israilli diplomatın qətlindən sonra ölkəsinin bütün diplomatik nümayəndəliklərində təhlükəsizlik tədbirlərinin gücləndirilməsi barədə göstəriş verib.
Oxu.Az TASS-a istinadən xəbər verir ki, o, ABŞ-nin paytaxtında baş verənlərdən danışaraq, faciənin İsrailə qarşı qızışdırmanın nəticəsi və antisemitizmin növbəti təzahürü olduğu qənaətində olduğunu bildirib.
Məlumata görə, terror aktı xəbərindən sonra Netanyahu İsrailin ABŞ-dəki səfiri Yexiel Layter və ABŞ-nin baş prokuroru Pam Bondi ilə danışıb və o, baş verənlərlə bağlı hazırda məlum olan bütün təfərrüatı baş prokurora çatdırıb.
Xatırladaq ki, Vaşinqtonda yəhudi muzeyi yaxınlığında atışma zamanı İsrail səfirliyinin iki əməkdaşı öldürülüb. Şəhərin polis rəisi Pamela Smitin sözlərinə görə, ölən diplomatlar kişi və qadındır. Onlar muzeydə keçirilən tədbirdən çıxarkən 30 yaşlı şübhəli şəxs onlara atəş açıb. Atəş açan şəxs saxlanılıb. Smit bildirib ki, həmin vaxt o, "Fələstinə azadlıq!" şüarını səsləndirib.
