Finlandiyanın telekommunikasiya avadanlıqları istehsalçısı "Nokia" 2026-cı ilin sonunadək Çindəki bütün zavodlarını bağlamağı planlaşdırır.
Oxu.Az "South China Morning Post"a (SCMP) istinadən xəbər verir.
Qeyd olunur ki, 2025-ci ilin sonuna "Nokia"nın Çin, Honkonq və Tayvandakı əməkdaşlarının sayı təxminən 7 200 nəfər olub. Şirkət 2026-cı ilin sonunadək onların əksəriyyətini işdən çıxarmağı planlaşdırır.
Mənbələrdən birinin sözlərinə görə, "Nokia"nın biznesi son illərdə tənəzzül yaşayır və buna görə də şirkət ölkədəki fəaliyyətini yenidən tənzimləmək qərarına gəlib.
İyulun 22-də "GSMArena"nın məlumatına görə, HMD "Nokia 123 Shield" düyməli telefonunu təqdim edib. Bu model markanın suya və toza davamlı ən əlçatan telefonu kimi təqdim olunur. Yeni məhsul artıq Avropada təxminən 35 avro qiymətinə satışa çıxarılıb.
İstehsalçının bildirdiyinə görə, "Nokia 123 Shield" IP65 standartının tələblərinə cavab verir və bunun sayəsində yağışdan, su sıçramalarından, qumdan və tozdan qorunur. Telefon həmçinin sürüşməyən yan səthlər, eləcə də qulaqlıq və enerji doldurma girişlərini qoruyan rezin möhürlərlə təchiz edilib.
