"Türkiyə Rusiya-Ukrayna müharibəsində döyüşən tərəflər arasında uğurla vasitəçilik edən yeganə ölkədir".
Bunu Macarıstanın Baş naziri Viktor Orban özünün "X" sosial şəbəkə hesabından yazıb.
O, Türkiyə Prezidenti Rəcəb Tayyib Ərdoğanı sülh missiyasında mühüm tərəfdaş adlandırıb.
Hökumət başçısının mətbuat katibi Bertalan Havaşi, öz növbəsində, Vaşinqtonda (ABŞ) keçirilən NATO sammiti çərçivəsində Ərdoğan və Orbanın görüşdükləri barədə məlumat yayıb.
"Baş nazir Viktor Orban Vaşinqtonda Türkiyə Prezidenti Rəcəb Tayyib Ərdoğanla Macarıstanın sülhməramlı missiyası barədə danışıqlar aparıb. Söhbət zamanı Rusiya-Ukrayna müharibəsi müzakirə olunub. Viktor Orban Türkiyənin münaqişədə hələlik yeganə uğurlu vasitəçi olduğunu nəzərə alaraq, Macarıstanın sülhməramlı missiyasına dəstək verməsini xahiş edib", - deyə o bildirib.
Yeri gəlmişkən, Türkiyə Prezident Administrasiyasının Kommunikasiyalar İdarəsi görüş barədə məlumat yayıb. Bildirilib ki, iclasda, həmçinin, Türkiyənin xarici işlər naziri Hakan Fidan, milli müdafiə naziri Yaşar Güler, Milli Kəşfiyyat Təşkilatının rəhbəri İbrahim Kalın və digər rəsmilər iştirak ediblər.
Qeyd olunub ki, liderlər ölkələr arasında ikitərəfli münasibətləri, Türkiyənin Avropa İttifaqına (Aİ) daxil olmasını, həmçinin, regional və qlobal problemləri, o cümlədən Rusiya-Ukrayna müharibəsində sülh səylərini müzakirə ediblər.
Türkiyə lideri qeyd edib ki, Ankara Macarıstanın sədrliyi dövründə Türkiyənin Avropa İttifaqına daxil olması prosesinin intensivləşdirilməsinə və Aİ ilə əlaqələrin inkişafına dəstək verəcəyinə ümid edir.
Mənbə: "Anadolu" Agentliyi
