Parisdə Fransanın müstəmləkəçilik siyasətinə qarşı aksiya keçirilib

Fransanın paytaxtı Parisin mərkəzində, Eyfel qülləsinin önündə yerləşən Trokadero - İnsan Hüquqları meydanında Bakı Təşəbbüs Qrupunun təşkilatçılığı və fransız müstəmləkələrinin müstəqillik hərəkatlarının üzvlərinin iştirakı ilə "Dekolonizasiya gününə" (BMT Baş Assambleyası 14 dekabr 1960-cı ildə "Müstəmləkə ölkələrinə və xalqlarına müstəqilliyin verilməsi haqqında Bəyannamə" qəbul edib - red.) həsr olunmuş etiraz aksiyası keçirilib.

Oxu.Az "Report"a istinadən xəbər verir ki, aksiyada "Kolonializmə son, azadlıq"", "Azadlıq üçün mübarizə edək!", "Azad gələcək üçün birlikdə!", "Dekolonizasiya indi başlayır!", "Gəlin tarixi öz sözlərimizlə və öz mübarizəmizlə yenidən yazaq", "Torpaqlarımızı və tariximizi bizə geri ver!" kimi müxtəlif şüarlar səsləndirilib.

Aksiyada Komor adalarını, Qvadelupanı, Fransa Polineziyasını, Reunionu, Yeni Kaledoniyanı, Sen Marteni, Korsikanı və Martinikanı təmsil edən müstəqillik hərakatlarının nümayəndələri iştirak ediblər.

Aksiyaçılar 14 dekabr 1960-cı ildə BMT Baş Assambleyası tərəfindən qəbul edilmiş 1514 nömrəli Qətnamənin yerinə yetirilməsi, eyni zamanda beynəlxalq ictimaiyyəti və təşkilatları müstəmləkələrdəki cari vəziyyətə adekvat reaksiya göstərməyə çağırış ediblər.