Qətərin ərazi sularında hərbi helikopterin qəzaya uğraması nəticəsində həlak olanlar arasında Türkiyə vətəndaşları da var.
Oxu.Az "TRT Haber" telekanalına istinadən xəbər verir ki, bu barədə Türkiyənin Müdafiə Nazirliyi məlumat yayıb.
Məlumata görə, həlak olanlardan biri Türkiyə Silahlı Qüvvələrinin hərbi qulluqçusu, ikisi isə ASELSAN şirkətinin texniki işçiləri olub.
Bildirilir ki, qəzanın dəqiq səbəbi Qətər rəsmiləri tərəfindən aparılacaq araşdırmanın nəticəsində müəyyən ediləcək.
Xatırladaq ki, qəzaya uğramış helikopterin göyərtəsində ümumilikdə yeddi nəfər olub.
Qətərin ərazi sularında qəzaya uğrayan hərbi helikopterin göyərtəsindəki yeddi nəfərdən altısının cəsədi tapılıb.
Oxu.Az xəbər verir ki, bu barədə Qətər Daxili İşlər Nazirliyi sosial şəbəkələrdə məlumat yayıb.
Qeyd edilir ki, xilasedicilər son itkin düşən şəxsin axtarışını davam etdirirlər.
Qətər Silahlı Qüvvələrinə məxsus helikopter texniki nasazlıq səbəbindən əmirliyin sahilləri yaxınlığında dənizə düşüb.
Oxu.Az TASS-a istinadən xəbər verir ki, bu barədə Qətər Müdafiə Nazirliyi məlumat yayıb.
"Hərbi helikopter gündəlik tapşırığı yerinə yetirərkən qəzaya uğrayıb və Qətərin ərazi sularına düşüb. Qəzanın səbəbi texniki nasazlıq olub", - deyə əmirliyin müdafiə idarəsinin məlumatında bildirilir.
Hərbçilər əlavə ediblər ki, helikopterin ekipaj üzvlərinin və sərnişinlərinin axtarışı aparılır.
