Armen Qriqoryan Ermənistan Təhlükəsizlik Şurasının katibi vəzifəsindən getdikdən sonra Nikol Paşinyanın ona təklif etdiyi digər postdan imtina edib.
Oxu.Az xəbər verir ki, bu barədə erməni mediası məlumat yayıb.
Bildirilib ki, Qriqoryan onun əvəzlənməsi ilə bağlı qərarın qəbul edilmə forması ilə razılaşmayıb və bundan narazı qalıb.
Nəşrin məlumatına əsasən, Paşinyan Qriqoryanın işindən hər hansı bir narazılığı olmadığı üçün onunla sağollaşmayacağını bildirib. O, sadəcə olaraq, mövcud siyasi vəziyyətdə belə bir kadr yerdəyişməsini məqsədəuyğun hesab edib.
Bu qərardan sonra tərəflər arasında gərgin danışıq olub. Qəzet iddia edir ki, hələ avqustun 13-ü səhər saatlarında Paşinyan Qriqoryanı komandada saxlamağa çalışaraq, ona özünün baş məsləhətçisi postunu təklif edib. Lakin o, bu təklifi qəti şəkildə rədd edib.
Eyni zamanda, iddialara görə, Qriqoryan əvvəlcə Təhlükəsizlik Şurasını tərk etməyə və başqa bir vəzifədə fəaliyyətini davam etdirməyə razı olub. Lakin onun yerinə məhz kimin keçəcəyi məlum olduqda vəziyyət dəyişib. Qəzet yazır ki, Paşinyanın Simonyanı bu posta gətirmək planlarından hətta öz komandasının bir çox üzvləri belə xəbərsiz olub, bu səbəbdən qərar onlar üçün də gözlənilməz olub.
Bundan əlavə, baş nazirin ətrafındakılar Simonyanın parlament seçkisindən sonra uzun bir fasilə götürəcəyini və bir müddət aktiv siyasətə qayıtmayacağını düşünürdülər. Məlumata görə, nəticədə onun qəfil təyinatı və Qriqoryanın gedişi hakim Vətəndaş Sazişi Partiyası daxilindəki gərginliyi daha da artırıb.
"Komandanın bir çox üzvləri Qriqoryana qarşı bu cür rəftarı səhv hesab edirlər, çünki o, 2018-ci il inqilabının qurucularından biri olub", - deyə qəzet qeyd edir.
