Rusiya Müdafiə Nazirliyi hava-desant qoşunlarının Ulyanovsk briqadasının bazasında üç alaydan ibarət olacaq 104-cü qvardiya desant-hücum diviziyasını bərpa edir.
Oxu.Az xəbər verir ki, bu barədə TASS-a Rusiya Silahlı Qüvvələri Baş Qərargahındakı mənbə bildirib.
“Ulyanovsk briqadasından 104-cü qvardiya desant-hücum diviziyasını yaratmaq qərara alınıb. Sovet İttifaqı dövründə öz cəsurluğu ilə şöhrət tapmış bu qvardiya Kirovabadda (Azərbaycanın İndiki Gəncə şəhəri) yerləşirdi”, - həmsöhbət bildirib.
Onun sözlərinə görə, yaradılan birləşmənin tərkibində üç alay olacaq:
“Bu alayları Ulyanovsk, Engels və Orenburqda yerləşdirmək planlaşdırılır”.
Agentliyin həmsöhbəti diviziyanın nə vaxt yaradılacağını dəqiqləşdirməyib, amma təşkilati ştat tədbirləri yaxın illərdə həyata keçiriləcək.
Rusiyanın hava-desant qoşunlarının tərkibinə dörd hava-desant və desant-hücum diviziyası və dörd desant-hücum briqadası, eləcə də xüsusi təyinatlı briqada daxildir.
Qeyd edək ki, diviziya 1944-cü ilin dekabr ayında yaradılıb. Diviziyanın yekun formalaşdırılması 1946-cı ildə baş verib. Bu zaman 104-cü atıcı diviziyası, Kutuzov ordenli 104-cü hava-desant qvardiyasına çevrilmişdi. Diviziya Kirovabad (indiki Gəncə) və Şamxor (indiki Şəmkir) şəhərlərində yerləşirdi.
1933-cü ildə diviziya Azərbaycandan çıxarılaraq, tam olaraq Ulyanovsk və Polivna qəsəbəsinə (1180-ci qvardiyanın artilleriya alayı) köçürülür və 1998-ci ildə ixtisar edilənə qədər burada yerləşir.
1998-ci ildə diviziya briqadaya qədər ixtisar edilərək, 31-ci Kutuzov ordenli hava-desant qvardiyası adını alır.
