Türkiyə və Rusiya Xarici İşlər nazirlikləri Cənubi Qafqazdakı vəziyyəti, Mərkəzi Asiyada qarşılıqlı fəaliyyətin inkişafını, habelə Rusiya-Ukrayna münaqişəsini müzakirə ediblər.
Oxu.Az xəbər verir ki, bu barədə Rusiya Xarici İşlər Nazirliyinin (XİN) rəsmi saytında dərc olunan məlumatda bildirilir.
Türkiyə tərəfindən məsləhətləşmələrdə Şərqi Avropa və Cənubi Qafqaz üzrə Baş İdarənin müdiri Mehmet Samsar, Rusiya tərəfindən isə xarici işlər nazirinin müavini Mixail Qaluzin iştirak edib.
"Mərkəzi Asiyada və Cənubi Qafqazda yeni ayırıcı xətlər yaradacaq kənar təşəbbüslərin gətirilməsinin qəbuledilməzliyi qeyd olunub. Bu kontekstdə tərəflər "regional məsuliyyət" prinsipi əsasında sabitlik və təhlükəsizliyin möhkəmləndirilməsi üçün perspektivli mexanizm kimi "3+3" Regional Əməkdaşlıq Platformasının (Azərbaycan, Ermənistan, Gürcüstan və Rusiya, İran, Türkiyə) ritmik işinin davam etdirilməsində maraqlı olduqlarını vurğulayıblar", - deyə qurumun bəyanatında qeyd olunur.
