Rusiyanın Tümen Vilayət Məhkəməsi 11 il əvvəl 2 saylı Regional Klinik Xəstəxananın xəstəsini qətlə yetirmiş iki Azərbaycan vətəndaşına qiyabi hökm çıxarıb.
Oxu.Az-ın Lenta.ru-ya istinadən xəbərinə görə, bu barədə regional məhkəmə sisteminin mətbuat xidmətindən məlumat verilib.
Nəsimi Paşa oğlu Əmiraslanov 15 il müddətinə, Bəhruz Rəhim oğlu Nəbiyev isə 16 il müddətinə azadlıqdan məhrum edilib. Cəza müddəti məhkumların Rusiya hüquq-mühafizə orqanlarına təhvil verildiyi gündən hesablanacaq. Onlar federal axtarışa veriliblər.
Xatırladaq ki, 2014-cü il mayın 29-da axşam saatlarında Tümendə "Baku" kafesində münaqişə baş verib, münaqişə zamanı bir kişi bıçaqlanıb. O, 2 saylı Regional Klinik Xəstəxanaya çatdırılsa da, həyatını xilas etmək mümkün olmayıb. Daha sonra onu bıçaqlayan şəxs də həmin xəstəxanaya gətirilib. Əmiraslanov və Nəbiyev qərara gəliblər ki, yoldaşlarının ölümündə həmin şəxs günahkardır. Onlar xəstəni təpikləyiblər, sonra isə oturacaq ilə vurublar. Sonra zərərçəkmişi çölə çıxararaq, boyun və sinə nahiyəsindən bıçaqlayıblar. Tibb müəssisəsində zərərçəkəni xilas edə bilməyiblər.
