Rusiyanın Ukrayna ərazisindəki obyektlərə hücum etməsi ehtimalı ilə əlaqədar Varşava qırıcı təyyarələri işə salıb.
Oxu.Az xəbər verir ki, bu barədə Polşa Ordusu Əməliyyat Komandanlığı məlumat verib.
Qurumun "X" sosial şəbəkə hesabında yayılan bəyanatda qeyd olunur ki, Rusiyanın Ukrayna ərazisinə aviazərbələri səbəbindən hərbi təyyarələr Polşa hava məkanında uçuşlara başlayıb. Bildirilir ki, qırıcılar və radiolokasiya aşkarlama təyyarəsi havaya qaldırılıb, yerüstü hava hücumundan müdafiə və radar idarəetmə sistemləri həyəcan vəziyyətinə gətirilib.
Komandanlığın verdiyi məlumata görə, Polşa hava məkanında naməlum uçan obyekt aşkar edilib və onun qəzaya uğradığı yer sonradan müəyyən edilib.
Bildirilir ki, qərbə doğru hərəkət edən naməlum obyekt Polşa hərbi qüvvələri tərəfindən yerli vaxtla saat 3:40-da (Bakı vaxtı ilə saat 5:40-da) aşkarlanıb. Onu müəyyən etmək və ələ keçirmək üçün növbətçi "F-16" qırıcısı havaya qaldırılıb. Hərbçilərin sözlərinə görə, obyekt aşkar edildikdən altı dəqiqə sonra radarlardan yoxa çıxıb.
Daha sonra Polşa polisi "X" sosial şəbəkəsində Polşanın şərqindəki Lyublin bölgəsində, ən yaxın yaşayış məntəqəsindən təxminən 2 km məsafədə güclü partlayış olduğunu və dərin çökəklik aşkarlandığını bildirib. Çökəklik yaxınlığında naməlum obyektin parçaları tapılıb.
Qəza bölgəsinə "Mi-24" helikopteri ilə bərabər, aidiyyəti xidmət qurumlarının əməkdaşları cəlb olunublar. Hazırda ərazidə axtarış tədbirləri aparılır. İnsan itkisi və ya hər hansı maddi ziyan barədə məlumat daxil olmayıb.
