Saxlanılan məşhur türkiyəli aktyor, qalmaqallı "Şakir paşa ailesi: Mucizeler və skandallar" serialında Şakir paşanın oğlu Cevat Şakir obrazını canlandıran Cem Yiğit Üzümoğlu üçün hansı cəzanın veriləcəyi məlum olub.
Oxu.Az-ın xəbərinə görə, bu barədə "Haber Global" məlumat verib.
Məlumata görə, aralarında Cem Yiğit Üzümoğlunun da olduğu 21 şübhəlinin aprelin 2-də sosial mediada ölkə daxilində bütün ticarət fəaliyyətlərinin dayandırılması çağırışları ilə bağlı aparılan istintaq yekunlaşıb.
İttiham aktında bildirilir ki, şübhəlilər tərəfindən paylaşılan boykot mövzulu yazılar cəmiyyətdaxili birlik və həmrəylik kimi ümumi dəyərləri pozaraq, cəmiyyətin sosial sinif baxımından fərqli xüsusiyyətlərinə malik bir hissəsinin başqa bir təbəqəyə qarşı açıq-aşkar nifrət və düşmənçiliyə sövq edilməsinə səbəb olub, ifadə edilən cümlələr bölücü və nifrətdoğurucu xarakterli olmaqla, ictimai təhlükəsizliyin pozulması baxımından açıq və qaçılmaz təhlükə yaradıb.
"İnsanlar arasında ayrı-seçkilik edərək bir şəxsin normal iqtisadi fəaliyyətlə məşğul olmasına mane olmaq" və "mətbuat və yayım vasitəsilə ictimaiyyəti nifrət və düşmənçiliyə açıq şəkildə təşviq etmək" ittihamları üzrə Cem Yiğit Üzümoğlu və digər şübhəlilərin hər biri üçün ayrı-ayrılıqda 2 il 6 aydan 7 il 6 aya qədər olmaqla, həbs cəzası tələb edilib.
