İtaliyanın Siciliya adasındakı Kataniya hava limanının fəaliyyəti Etna vulkanının kül püskürməsi ilə müşayiət olunan aktivliyi səbəbindən dayandırılıb.
Oxu.Az xəbər verir ki, bu barədə yerli mülki aviasiya idarəsi məlumat yayıb.
Qeyd olunub ki, uçuşların dayandırılması və gələn reyslərin qəbulu avqustun 11-də yerli vaxtla saat 06:00-dək (Bakı vaxtı ilə saat 08:00) uzadılıb.
Sərnişinlərə hava limanına getməzdən əvvəl reysləri ilə bağlı ən son məlumatları yoxlamaq tövsiyə olunub.
İtaliya Milli Geofizika və Vulkanologiya İnstitutunun (INGV) məlumatına görə, Etnanın Voracine kraterində intensiv partlayışlı aktivlik davam edir. Kraterdən güclü kül tullantıları atmosferə qalxaraq cənub-cənub-qərb istiqamətində yayılır.
Mütəxəssislər, həmçinin dəniz səviyyəsindən təxminən 2 750 və 2 360 metr yüksəklikdə yerləşən iki püskürmə ocağının fəaliyyət göstərdiyini bildiriblər. Bu ocaqlar bir neçə lava axınını qidalandırır. Lava axınlarının ən uzaq hissələri dəniz səviyyəsindən təxminən 1 500 metr yüksəklikdə yerləşir.
