Şimali Kipr sahillərində batan "FiloJet" sərnişin gəmisi ilə bağlı başladılan istintaq çərçivəsində həbs edilənlərin sayı 14 nəfərə yüksəlib.
Oxu.Az xəbər verir ki, bu barədə TRT telekanalı məlumat yayıb.
Bundan əvvəl doqquz nəfərin, o cümlədən kapitan da daxil olmaqla azı səkkiz ekipaj üzvünün saxlanıldığı bildirilirdi. Onlar məhkəmədə verdikləri ifadədə dalğaların təsirindən gəminin burun hissəsinin qırıldığını, nəticədə göyərtəyə su dolaraq qəzaya səbəb olduğunu iddia ediblər.
Axtarış-xilasetmə tədbirləri hazırda davam etdirilir. Hələ də 18 nəfər itkin düşmüş hesab olunur. Axtarış prosesi Türkiyədən göndərilmiş iki pilotsuz uçuş aparatı və bir təyyarə vasitəsilə həyata keçirilir. Əraziyə sahil mühafizə xidmətinin katerləri və dalğıclar cəlb olunublar. Hadisə ilə əlaqədar olaraq Şimali Kiprin Girne limanı ilə Türkiyənin Taşucu və Anamur limanları arasında planlaşdırılan bərə reysləri təxirə salınıb. Bu barədə adada fəaliyyət göstərən nəqliyyat şirkətləri və yerli rəsmilər məlumat veriblər.
Qeyd edək ki, bazar günü Girne limanından Türkiyə istiqamətinə yola düşən gəminin göyərtəsində ümumilikdə 267 nəfər olub. Kipr türklərinin lideri Tufan Erhürman 241 nəfərin xilas edildiyini, 8 sərnişinin isə həyatını itirdiyini qeyd edib. Gecə boyu fasiləsiz şəkildə davam edən xilasetmə əməliyyatı səhər saatlarında daha da gücləndirilib. Hazırda itkin düşən 18 nəfərin taleyi barədə heç bir yeni məlumat daxil olmayıb.
