"Starlink"in sürətli internet xidməti Ermənistanda aktiv edildi

Amerikalı sahibkar İlon Maskın "Starlink" qlobal peyk rabitə sisteminin xidmətləri Ermənistanda istifadəyə verilib.

Oxu.Az Ermənistan KİV-ə istinadən xəbər verir ki, bu barədə ölkənin yüksək texnologiyalar sənayesi naziri Mxitar Ayrapetyan bildirib.

"Starlink"in regionda buraxılması planları hələ 2022-ci ildə elan edilmişdi.

Qeyd edək ki, "Starlink" İlon Maskın "SpaceX" şirkəti tərəfindən hazırlanmış qlobal peyk şəbəkəsidir. Layihə dünyanın istənilən nöqtəsini yüksəksürətli genişzolaqlı internetlə təmin etmək məqsədi daşıyır. Peyk buraxılışları "SpaceX" raketləri ilə həyata keçirilir.

"Starlink" hazırda ABŞ, Kanada, Avstraliya, Avropanın əksər hissəsi, Latın Amerikası və Afrikanın bir sıra ölkələrində xidmət göstərir.