"Air India" aviaşirkətinin sərnişinləri tualetlərin daşması səbəbindən 10 saat havada vaxt itiriblər.
Oxu.Az xəbər verir ki, bu barədə "One Mile At A Time" portalı məlumat verib.
Hadisə göyərtəsində üç yüz sərnişinin olduğu, Çikaqodan Dehliyə uçan "Boeing 777-300ER" təyyarəsində baş verib. Qeyd olunur ki, Hindistanın paytaxtına uçuş 14 saat davam etməli idi. Kapitan uçuşu dayandırmaq qərarına gəlməzdən əvvəl təyyarə Kanada və Qrenlandiya üzərindən uçub.
Nəticədə təyyarə Atlantik okeanı üzərindən geriyə çevrilib və texniki nasazlıq səbəbindən yola düşdüyü hava limanına qayıdıb. Məlum olub ki, göyərtədəki onlarla tualetdən yalnız biznes sinifdə olan biri işlək vəziyyətdə olub.
Hadisə aviasiya ictimaiyyətində müzakirə mövzusuna çevrilib. Mütəxəssislər əmindirlər ki, bütün tualetlərin dolu olması ilə bağlı vəziyyət təyyarələrə texniki qulluqda problemlər olduğunu göstərir.
