Tokayev: "Qazaxıstanda heç kim insanlara hansı dildə danışmalı olduqlarını diktə edə bilməz"

"Heç kimin insanlara hansı dildə danışmalı olduqlarını diktə etmək ixtiyarı yoxdur".

Oxu.Az-ın Zakon.kz saytına istinadən xəbərinə görə, bu sözləri Kasım-Jomart Tokayev aprelin 24-də Qazaxıstan Xalqları Assambleyasının XXXIV sessiyasında çıxışı zamanı deyib.

O bildirib ki, bu gün məzunların 80%-ə yaxını vahid milli test imtahanını dövlət dilində verir və bu il birinci sinfə gedənlərin 70%-dən çoxu qazax dilində təhsilə başlayacaq.

"Və təbii ki, Qazaxıstanda heç kimin şəxsi ünsiyyət və ictimai çıxışlar zamanı insanlara hansı dildə danışmalı olduqlarını diktə etmək hüququ yoxdur. Bu mövzuda cəmiyyətimizdə nifaq salmaq, ölkə daxilində sabitliyi pozmaq məqsədi daşıyan bütün təxribat xarakterli hərəkətlərin qarşısı alınacaq və qanunla cəzalandırılacaq", - deyə prezident qeyd edib.