ABŞ Prezidenti Donald Trampla Ukrayna Prezidenti Volodimir Zelenski arasında münasibətlərdə gərginliyin əsası sentyabrın 23-də Nyu-Yorkda baş tutan görüşdə qoyulub və bundan sonra Birləşmiş Ştatlar altı dəfə Ukraynadan Rusiyanın neft emalı zavodlarına (NEZ) zərbələri dayandırmağı istəyib.
Oxu.Az xəbər verir ki, bu barədə mənbələrə istinadən "Wall Street Journal" (WSJ) məlumat yayıb.
Məlumata görə, ABŞ altı dəfə Ukraynaya zərbələri dayandırmaq xahişi ilə müraciət edib. Ukrayna rəsmiləri Rusiya ilə istənilən enerji atəşkəsinə razılaşacaqlarını bildirsələr də, Rusiya bundan imtina edib, buna görə də onlar geri çəkilməyiblər.
Nəşrin mənbələri bildiriblər ki, sentyabrdakı görüşdə Tramp Ukrayna rəhbərindən Rusiyanın neft emalı zavodlarına endirilən zərbələrlə bağlı izahat almağa çalışıb. Görüşdən sonrakı bir ay müddətində Trampın Zelenskiyə olan münasibəti daha da pisləşib.
WSJ-nin həmsöhbətlərinin sözlərinə görə, ABŞ prezidenti Ukraynanın Rusiya neft emalı zavodlarına zərbə endirmək üçün Amerika resurslarından istifadə etməsindən narazı qalıb; onun fikrincə, bu cür hərəkətlər sonda amerikalılara zərər verə bilər.
Qeyd edək ki, oktyabrın 14-də Zelenski Rusiya ilə dizel sövdələşməsindən sonra özünü Tramp tərəfindən xəyanətə uğramış hiss etdiyini bəyan edib.
