Azərbaycan-Gürcüstan sərhədində qəzaya uğrayan "C-130" hərbi yük təyyarəsində 20 əsgərin həlak olması ilə bağlı Türkiyə Milli Müdafiə Nazirliyi (MMN) məlumat yayıb.
Oxu.Az Türkiyə MMN-ə istinadən xəbər verir ki, nazirlik ehtiyat tədbiri kimi istismarda olan bütün "C-130" təyyarələrinin uçuşlarının dayandırıldığını açıqlayıb.
"Təyyarələrimizin uçuşları 2025-ci il noyabrın 12-dən etibarən ehtiyat tədbiri olaraq dayandırılıb. Ətraflı texniki yoxlamalar tamamlandıqdan sonra uyğun hesab edilən təyyarələrin uçuşları bərpa olunacaq", - deyə nazirliyin açıqlamasında bildirilib.
Əlavə edilib ki, Gürcüstanda qəzaya uğrayan "C-130" təyyarəsinin göyərtəsində şəxsi heyət və təyyarəyə texniki xidmət vasitələri olub, döyüş sursatı isə olmayıb.
Xatırladaq ki, noyabrın 11-də Azərbaycan-Gürcüstan sərhədində Türkiyənin "C-130" hərbi yük təyyarəsinin qəzaya uğraması nəticəsində 20 türk əsgəri şəhid olub.
