İstanbulda "boykot" çağırışlarına görə saxlanılanlar azadlığa buraxıldılar

İstanbulda məhkəmə sosial şəbəkələrdə iqtisadi "boykot"a çağırışlar səbəbindən daha əvvəl saxlanılan 11 şübhəlini təhqiqatın aparıldığı müddətə azad edib.

Bu barədə Oxu.Az "Haber Global" telekanalına istinadla xəbər verir.

Məhkəmə İstanbul prokurorluğunun vəsatətini təmin edib və 11 şübhəlini ölkədən çıxmamaq barədə iltizam alaraq və ayda iki dəfə polisdə olmaq öhdəliyi ilə azadlığa buraxıb.

Qeyd edək ki, saxlanılanlar arasında tanınmış aktyor Cem Yiğit Üzümoğlu da olub.

17:28

Türkiyədə İstanbul Respublika Baş Prokurorluğunun İstanbul Böyükşəhər Bələdiyyəsi ilə bağlı apardığı korrupsiya istintaqından sonra Cümhuriyyət Xalq Partiyasının (CHP) "boykot" çağırışı ilə əlaqədar 11 nəfər saxlanılıb.

Oxu.Az-ın xəbərinə görə, bu barədə "TRT Haber" məlumat verib.

Məlumata görə, CHP-nin çağırışından sonra ənənəvi və sosial mediada edilən boykot çağırışlarında bölücü ritorikalar və onları yayan şəxslərə qarşı araşdırma başlanılıb. "Nifrət və ayrı-seçkilik" və "İctimaiyyəti nifrət və düşmənçiliyə sövq etmək" cinayətləri ilə bağlı aparılan bu istintaq çərçivəsində 16 nəfər barəsində saxlanılma qərarı verilib.

Polis qrupları tərəfindən çox sayda ünvanda eyni vaxtda əməliyyat həyata keçirilib. Əməliyyat zamanı şübhəlilərdən 11-i saxlanılıb. Digər şübhəlilərin tutulması istiqamətində işlər davam etdirilir.

Xatırladaq ki, İstanbul Böyükşəhər Bələdiyyəsinin keçmiş sədri Ekrem İmamoğlunun həbsindən sonra CHP sədri Özgür Özel tərəfindən "boykot" çağırışı edilmişdi.