Türkiyənin Muğla bölgəsində 7 il əvvəl zibil konteynerində torbanın içində ölü tapılan körpə qız uşağının qatilinin anası olduğu üzə çıxıb.
Bu barədə Oxu.Az "Haber Global"a istinadən xəbər verir.
Məlumata görə, cinayətini etiraf edən 42 yaşlı ana Gülcan Deniz və hadisədən xəbərdar olan 43 yaşlı ata İsmayıl Deniz həbs ediliblər.
Xatırladaq ki, 10 iyul 2018-ci ildə Ortaca rayonu Ekşiliyurt məhəlləsində sakinlər zibil konteynerində torbanın içinə qoyulmuş körpə tapıblar. Hadisə yerinə gələn polis və sağlamlıq qrupları körpənin doğuşdan dərhal sonra, göbək bağı belə kəsilmədən konteynerə atıldığını və qızcığazın həyatını itirdiyini müəyyən ediblər.
Muğla Regional Polis İdarəsinin Cinayət Bürosu Komandanlığının qrupları 7 il sonra cinayət işinə dair sənədi yenidən araşdırmağa başlayıblar. Zibil qutusuna atılan bir mağazaya aid torba diqqət çəkib və iyul ayında marketdəki 30 günlük görüntülər araşdırılıb. Polis kamera görüntülərindən şübhəlinin körpənin anası Gülcan Deniz olduğunu aşkarlayıb.
Ana saxlanılıb və o, ifadəsində dəhşətli həqiqəti soyuqqanlılıqla etiraf edib. Gülcan Deniz körpənin özünə aid olduğunu, ərinin ona davamlı işgəncə verdiyini, uşağı dünyaya gətirmək istəmədiyini və körpəni evin qonaq otağında dünyaya gətirdikdən sonra boynuna bir parça ilə düyün bağladığını bildirib. Daha sonra o, körpəsinin cəsədini torbaya qoyaraq zibil konteynerinə atdığını etiraf edib.
Deniz cütlüyü məhkəmədə həbs edilib.
