Dörd ABŞ ştatının baş prokuroru yeniyetmələrdə sosial şəbəkə asılılığı formalaşdırdığı ittihamı ilə "Meta" şirkətinə qarşı məhkəmə prosesinə başlayıb. Bu iddia nəticəsində texnologiya nəhəngini 1.4 trilyon dollar civarında nəhəng bir cərimə gözləyə bilər.
Oxu.Az xəbər verir ki, bu barədə "Reuters" agentliyi məlumat yayıb.
Şirkətə qarşı iddialar Nyu-Cersi, Kentukki, Kolorado və Kaliforniya ştatlarının rəsmiləri tərəfindən qaldırılıb. Şikayətçilərin sözlərinə görə, "Meta" rəhbərliyi "Facebook" və "Instagram" platformalarını qəsdən elə hazırlayıb ki, azyaşlı istifadəçilərin diqqətini daim özündə saxlasın və onlarda güclü asılılıq yaratsın. Həmçinin korporasiya bu sosial şəbəkələrin uşaqlar üçün təhlükəsiz olduğu barədə cəmiyyətə yalan məlumat verməkdə günahlandırılır.
Tələb olunan təzminatın həcmi "Meta"nın prokurorların müraciətlərinə verdiyi rəsmi məhkəmə cavabı zamanı məlum olub. Texnologiya nəhəngi 1.4 trilyon dollarlıq təzminat tələbinin heç bir dəlilə söykənmədiyini və tamamilə əsassız olduğunu bildirib. Şirkətin açıqlamasına əsasən, Birləşmiş Ştatların istehlakçı hüquqlarının qorunması tarixində bu miqyasda sanksiya tətbiqi təcrübəsi mövcud deyil. "Meta" həmçinin iddiaların hüquqi və faktiki cəhətdən əsassız olduğunu vurğulayaraq, məhkəmə prosesində öz hüquqlarını sonadək müdafiə edəcəyini bəyan edib.
"Reuters"in məlumatına görə, tələb olunan təzminat məbləği "Meta"nın təxminən 1.5 trilyon dollar qiymətləndirilən hazırkı bazar kapitallaşması ilə müqayisə edilə bilər. Sözügedən məhkəmə işinə 2026-cı ilin avqust ayında Kaliforniyanın Oklend şəhərindəki federal məhkəmədə baxılması planlaşdırılır.
Kaliforniya ştatının prokurorluğu xüsusi olaraq vurğulayır ki, qaldırılan iddia "Meta"nın kommersiya maraqlarını azyaşlıların təhlükəsizliyindən üstün tutduğunu sübut edən faktlara əsaslanır. Prokurorluğun qənaətinə görə, korporasiyanın fəaliyyəti yeniyetmə və uşaqların psixoloji sağlamlığına ciddi zərər vurur, bu səbəbdən də şikayətçilər şirkətin qanun qarşısında cavab verməsini tələb edirlər.
