ABŞ-nin slalom avarçəkmə üzrə olimpiya yığmasının keçmiş üzvü David Hern Vaşinqtonda Linkoln memorialı yanındakı Güzgü gölünə (hovuzu) ziyan vurmaqda, vandalizmdə ittiham olunub. Onu 10 ilədək həbs cəzası gözləyir.
Oxu.Az xəbər verir ki, bu məlumatı "New York Post" nəşri Kolumbiya dairəsi üzrə federal prokuror Janine Pirroya əsaslanaraq yayıb.
"67 yaşlı Hern əmlaka zərərvurma maddəsi ilə günahlandırılır və bu cinayətə görə 10 ilədək həbs tələb oluna bilər. Onun hovuzun alt hissəsindən izolyasiya materialını qopartdığı ehtimal edilir", - deyə materialda bildirilir.
Federal prokurorun açıqlamasına əsasən, D.Hern dövlət əmlakına bilərəkdən ziyan vurub. Buna baxmayaraq, keçmiş idmançı irəli sürülən ittihamları qəbul etmir və günahsız olduğunu bildirir.
