ABŞ-nin paytaxtı Vaşinqtonun mərkəzi bulvarında "86 47" şəklində nəhəng rəqəmlər peyda olub. Bu hadisə ilə əlaqədar polis tərəfindən araşdırma başlanılıb.
Oxu.Az xəbər verir ki, bu barədə "The Washington Post" nəşri xəbər yayıb.
ABŞ hökuməti bu yazını ölkənin 47-ci prezidenti Donald Trampın həyatına qəsd təhdidi kimi dəyərləndirir. Bildirilib ki, İkinci Dünya müharibəsi Milli Memorialının yaxınlığındakı qazonda onlarla metr böyüklüyündə rəqəmlər peyda olub. Bu ərazi solmuş və ya tapdalanmış ot ləkələri kimi görünür. Yazının konturları yalnız böyük hündürlükdən, o cümlədən yaxınlıqda yerləşən Corc Vaşinqton Monumentindən aydın seçilir.
Hüquq-mühafizə orqanları rəqəmlərin qazona necə həkk olunduğunu müəyyənləşdirmək məqsədilə bitki və torpaq nümunələri götürüblər.
2026-cı ilin aprelində ABŞ hakimiyyəti Federal Təhqiqatlar Bürosunun (FTB) sabiq direktoru (2013-2017-ci illərdə xüsusi xidmət orqanına rəhbərlik edib) Ceyms Komiyə qarşı "Birləşmiş Ştatlar prezidentini həyatdan məhrum etmək və ona bədən xəsarətləri yetirməklə" hədələməsi ilə bağlı ittihamlar irəli sürüb. O, 2025-ci ilin mayında "Instagram" hesabında çimərlikdə 86 və 47 rəqəmləri formasında düzülmüş dəniz balıqqulaqlarının fotosunu paylaşmışdı.
İngilis dilindəki "to 86" jarqon ifadəsi kiməsə zərər yetirmək niyyəti və ya qətlə çağırış kimi təfsir edilə bilər. 47 rəqəmi isə bu kontekstdə ABŞ-nin 47-ci prezidenti olan Donald Trampa işarə edir. Sabiq FTB direktoru sərt tənqidlərlə üzləşdikdən qısa müddət sonra həmin paylaşımı silib və üzr istəyib.
Bu insident zamanı Donald Tramp Federal Təhqiqatlar Bürosunun (FTB) keçmiş direktoru Ceyms Komini "çirkli polis" adlandırıb və onu siyasətçilərə təhlükə yaratmaqda günahlandırmışdı.
Trampın sözlərinə görə, Kominin FTB-nin rəhbəri kimi hərəkətləri ABŞ siyasətində təhlükəli vəziyyətin yaranmasına səbəb olub.
