Xərçəngə qarşı "ağıllı bomba": Metastazları məğlub edir

"Riverside" Kaliforniya Universiteti və Miçiqan Dövlət Universitetinin tədqiqatçılar qrupu onkologiya sahəsində inqilabi irəliləyiş əldə ediblər. Alimlər aqressiv xərçəng formalarına qarşı "ağıllı bomba" kimi təsir göstərən işığa həssas kimyəvi maddələrin - siyanin-karboran duzlarının innovativ sinfini hazırlayıblar.

Oxu.Az-ın verdiyi məlumata görə, tədqiqat "Angewandte Chemie International Edition" (ACIE) elmi jurnalında dərc edilib.

Bildirilir ki, bu, metastatik süd vəzisi xərçəngi kimi aqressiv xərçəng formalarının müalicəsini əhəmiyyətli dərəcədə yaxşılaşdıra bilər.

"Fotodinamik terapiya (FDT) artıq dəri və sidik kisəsi xərçənginin müalicəsində istifadə olunur. Bu, xərçəng hüceyrələrində toplanan və işığın təsiri altında onları məhv edən işığa həssas kimyəvi maddələrin aktivləşdirilməsinə əsaslanır. Lakin ənənəvi FDT metodlarının çatışmazlıqları var: uzunmüddətli işığa həssaslıq, işığın aşağı nüfuzetmə qabiliyyəti və sağlam toxumalar üçün toksiklik. Yeni sianin-karboran duzları bu problemləri həll edir. Onlar orqanizmdən tez xaric olunur, yalnız xərçəng hüceyrələrində qalır və toxumalara daha dərin nüfuz edən yaxın infraqırmızı işıqla aktivləşir. Bu, əvvəllər FDT üçün əlçatmaz olan şişləri müalicə etməyə imkan verir", - deyə alimlər bildiriblər.

Tədqiqat müəllifləri vurğulayıblar ki, siçanlar üzərində aparılan sınaqlarda terapiya "ağıllı bomba" kimi sağlam toxumalara zərər vermədən şişləri tam məhv edib.

"Ən maraqlısı maddənin məhz xərçəng hüceyrələrini hədəfə alma və sağlam toxumalara zərər verməmə qabiliyyətidir", - deyə tədqiqatın müəlliflərindən biri olan Vinsent Lavallo qeyd edib.

Onun sözlərinə görə, duzlar xərçəng hüceyrələrinin təbii zəifliyindən istifadə edir və şişlərdə ifrat ekspressiya olunan OATP zülalları tərəfindən udulur. Bu, terapiyanı daha dəqiq və səmərəli edir və əlavə kimyəvi maddələrə ehtiyacı aradan qaldırır.

Tədqiqatçılar, həmçinin duzların digər enerji mənbələri ilə istifadə üçün modifikasiya edilə biləcəyini və bunun müalicə imkanlarını genişləndirəcəyini güman edirlər.