Yaponiya hakimiyyət orqanları qəzadan zərər görən "Fukusima-1" atom elektrik stansiyasının (AES) yaxınlığından yığılan torpaqdan Baş nazir Şiqeru İsibanın ofisinin və digər hökumət binalarının ərazisinin yaxşılaşdırılması üçün istifadə etmək niyyətlərini açıqlayıblar.
Bu barədə Oxu.Az SCMP-yə istinadən xəbər verir.
Bildirilib ki, bunda məqsəd aşağı radiasiyalı torpağın təhlükəsiz olduğunu və bütün ölkə üzrə ictimai layihələrdə istifadə oluna biləcəyini göstərməkdir.
Xatırladaq ki, 2011-ci il martın 11-də baş vermiş zəlzələ və sunamidən sonra Yaponiyanın şimal-şərqində tarixin ən böyük nüvə fəlakətlərindən biri baş verib. "Fukusima" AES-in üç reaktorunda yanacaq əriyib və bu da radioaktiv tullantıların axmasına, yaxınlıqdakı ərazilərin çirklənməsinə səbəb olub. Qəzadan sonra yığılan təxminən 14 milyon kubmetr həcmində torpaq AES-in yaxınlığındakı müvəqqəti anbarlarda saxlanılır və qanuna görə, 2045-ci ilin martına qədər "Fukusima" prefekturasından çıxarılmalıdır.
Hakimiyyət orqanları bu torpaqdan dövlət müəssisələrinin ərazisində gül bağları və digər məqsədlər üçün istifadə etməyi planlaşdırırlar. Bu, Fukusimadan kənarda ilk dəfə belə torpaqdan istifadə edilmə hadisəsi olacaq. Nazirlər Kabinetinin baş katibi Yoşimasa Hayaşi qeyd edib ki, ictimaiyyəti bu torpağın təhlükəsizlik olduğuna və faydalarına inandırmaq vacib əhəmiyyət kəsb edir.
Bununla belə, ictimai rəy maneəyə çevrilə bilər. Daha əvvəllər Tokioda və digər bölgələrdə torpaqdan istifadə etmək üçün cəhdlər yerli sakinlərin etirazları səbəbindən uğursuzluqla nəticələnib. Qanun həmçinin ciddi normalar müəyyən edir: radioaktiv sezium səviyyəsi kiloqramda 8000 bekkereldən yuxarı olan torpaqdan ictimai işlərdə istifadə etmək qadağandır.
