"Qatar Energy" şirkəti martın 19-da istehsal infrastrukturunun daha bir raket hücumuna məruz qaldığını təsdiqləyib.
Oxu.Az xəbər verir ki, bu barədə şirkət "X" hesabında məlumat dərc edib.
"Martın 18-də Ras Laffan sənaye şəhərinə edilən və xeyli ziyana səbəb olan əvvəlki hücuma əlavə olaraq, "Qatar Energy" şirkəti martın 19-u səhər saatlarında mayeləşdirilmiş təbii qaz istehsalı ilə əlaqəli bir neçə obyektin raket zərbəsinə məruz qaldığını və nəticədə ciddi və genişmiqyaslı ziyanın baş verdiyini təsdiqləyir", - deyə açıqlamada qeyd olunub.
Xəbərə görə təcili yardım xidmətləri hadisə yerinə göndərilib və xəsarət alan yoxdur.
Qətərin "Qatar Energy" dövlət neft-qaz şirkəti Rəs-Laffan şəhərində yerləşən mayeləşdirilmiş təbii qaz (LNG) zavodunun raket zərbələri nəticəsində ciddi zərər gördüyünü bəyan edib.
Oxu.Az TASS agentliyinə istinadən xəbər verir ki, şirkət sənaye obyektinin hədəf alındığını rəsmən təsdiqləyib.
Bildirilib ki, hadisə yerinə dərhal fövqəladə hallar xidməti cəlb olunub və yanğının söndürülməsi üçün genişmiqyaslı tədbirlər görülüb. Zərərin miqyası ciddi olsa da, ilkin məlumata görə, xəsarət alan yoxdur.
Xatırladaq ki, daha əvvəl Qətər hakimiyyəti İranın təhdidləri fonunda Rəs-Laffandakı LNG kompleksindən işçi heyətinin təxliyəsinə başlamışdı.
Hadisənin kökündə duran gərginlik isə İranın Buşehr vilayətinin Əsəluye bölgəsində yerləşən "Cənubi Pars" yatağında ABŞ və İsrailin zərbələri nəticəsində baş verən yanğın olub. Bu insidentdən sonra İran İnqilabı Keşikçiləri Korpusu (SEPAH) Səudiyyə Ərəbistanı, BƏƏ və Qətərdəki enerji obyektlərinə hücum edəcəyini bəyan etmişdi.
