Aprelin 17-də axşam saatlarında ABŞ-nin Əl Hodeyda əyalətindəki Ras-İsa neft limanına endirdiyi aviazərbələr nəticəsində ölənlərin sayı 74 nəfərə çatıb.
Oxu.Az xəbər verir ki, bu barədə TASS məlumat verib.
"Ənsar Allah" hökumətinin səhiyyə nazirliyi bildirib ki, 170-dən çox insan yaralanıb.
"İlkin məlumatlara görə, ABŞ-nin Ras-İsa limanına hücumu nəticəsində ölənlərin sayı 74 nəfərə çatıb, daha 171 nəfər isə yaralanıb. Təcili yardım və mülki müdafiə qrupları itkin düşənlərin və yaralıların axtarışlarını davam etdirir", - nazirliyin açıqlamasında bildirilir.
ABŞ Silahlı Qüvvələrinin Mərkəzi Komandanlığı (CENTCOM) Yəməndəki Ras-İsa neft limanına zərbələr endirildiyini və limanın məhv edildiyini açıqlayıb.
Oxu.Az xarici mediaya istinadən xəbər verir ki, bu addım İran tərəfindən dəstəklənən husi terrorçularının yanacaq mənbəyini aradan qaldırmaq məqsədi daşıyıb.
CENTCOM-un bəyanatında qeyd olunub ki, Ras-İsa limanı husilər tərəfindən hərbi əməliyyatlarını dəstəkləmək, nəzarət vasitəsi kimi istifadə etmək və idxaldan əldə edilən mənfəəti mənimsəmək üçün yanacaq əldə etmək məqsədilə istifadə olunub. Endiriən zərbələrin məqsədi husilərin iqtisadi potensialını zəiflətmək olub.
Husilərin rəsmi "Ənsar Allah" "Telegram" kanalında ABŞ-nin Ras-İsa limanına 14 hava zərbəsi endirdiyi bildirilib. Nəticədə 38 nəfər həlak olmuş, 102 nəfər isə ağır yaralanıb. Husilər iddia ediblər ki, liman tamamilə mülki infrastruktur olub.
Ras-İsa limanı Yəmənin Qırmızı dənizdəki əsas neft ixrac mərkəzlərindən biri olub. Limanın məhv edilməsi Yəməndəki vəziyyəti daha da gərginləşdirə və humanitar böhranı dərinləşdirə bilər.
