Azərbaycana ilk səyahət: ABŞ-li turist təəssüratlarını bölüşdü

"Bu mənim Azərbaycana ilk səfərimdir. Bakı mənim qəlbimdə ömürlük iz qoydu. Lakin əsl kəşf Qobustan Dövlət Tarixi-Bədii Qoruğu oldu. Biz Azərbaycanda belə heyrətamiz bir yerin olduğunu, hətta təsəvvür etmirdik".

Bunu ABŞ-li turist Nik Buççi Oxu.Az-a şərhində deyib.

O, Azərbaycana ilk səfəri ilə bağlı təəssüratını bölüşüb, Bakının gözəlliyi və Qobustanın tarixi irsi ilə heyrətini ifadə edib.

"Biz Qobustana ailəlikcə ölkənizdə keçirdiyimiz son gündə gəldik. Məlum oldu ki, səfərimiz, hətta mövcudluğundan xəbərsiz olduğum Beynəlxalq Abidələr və Tarixi Yerlər Gününə təsadüf edib. Bunun sayəsində qoruğa giriş pulsuz idi, bu da xoş sürpriz oldu", - deyə turist hisslərini bölüşüb.

Nik Buççi qeyd edib ki, bundan sonra müxtəlif ölkələrdə tarixi yerləri ziyarət etmək üçün səyahətlərini planlaşdıranda bu bayramı nəzərə alacaq.

O, həmçinin qonaqpərvər Bakıya yenidən gəlmək istəyini ifadə edib.

Rufina Abdullayeva