Bu gün bütün dünya Beynəlxalq Abidələr və Tarixi Yerlər Gününü qeyd edir. Bu münasibətlə Azərbaycanın mədəniyyət naziri respublikanın bütün mədəniyyət müəssisələrində və qoruqlarında açıq qapı günü elan edib.
Oxu.Az-ın məlumatına görə, Qobustan Dövlət Tarixi-Bədii Qoruğu da istisna olmayıb və qapılarını ziyarətçilər üçün açıb.
Qoruğun direktoru Vüqar İsayev mediatur zamanı jurnalistlərə bildirib ki, bu gün Qobustan qoruğunu mindən çox insan ziyarət edib.
"Xüsusilə sevindirici haldır ki, qonaqların əksəriyyətini uşaqlar və məktəblilər təşkil edib. Bundan əlavə, qoruğun xüsusi dəvəti ilə əlilliyi olan uşaqlar fəxri qonaq olublar və onlar üçün maraqlı ekskursiyalar təşkil edilib", - deyə o bildirib.
Direktorun sözlərinə görə, bu günün əhəmiyyəti həm Qobustan qoruğu, həm də Azərbaycanın bütün tarixi abidələri üçün çox böyükdür.
"Məqsədimiz abidələrin qorunmasının əhəmiyyəti, aparılan maarifləndirmə və təbliğat işləri haqqında məlumatı geniş auditoriyaya çatdırmaqdır. Hər bir Azərbaycan vətəndaşı ölkəmizin mədəniyyətini, tarixini və irsini qorumaq üçün səylərini birləşdirməlidir", - deyə V.İsayev qeyd edib.
Rufina Abdullayeva
