Cənubi Atlantik anomaliyası kimi tanınan Yerin zəif maqnit sahəsinin ərazisi 2014-cü ildən bəri əhəmiyyətli dərəcədə genişlənib.
Oxu.Az TASS-a istinadən xəbər verir ki, bu barədə Avropa Kosmik Agentliyi (AKA) məlumat verib.
"Cənubi Atlantik anomaliyası sadəcə vahid bir blok deyil. Afrikada o, Cənubi Amerikadan fərqli olaraq dəyişir. Bu regionda xüsusi bir şey baş verir ki, bu da sahənin daha intensiv zəifləməsinə səbəb olur", - deyə Danimarka Texniki Universitetində geomagnetizm üzrə professor Kris Finley bildirib.
AKA-nın məlumatına görə, 10 ildən artıq müddət ərzində anomaliyanın ərazisi kontinental Avropanın yarısına bərabər ölçüyə qədər böyüyüb.
Professor Finleyin sözlərinə görə, anomaliyanın belə davranışı Yerin xarici nüvəsi ilə mantiyası arasındakı sərhəddə maqnit sahəsində qəribə qanunauyğunluqlarla əlaqədardır.
Qeyd edək ki, Cənubi Atlantik anomaliyası Cənubi Amerikadan Afrikanın cənub-qərb hissəsinə qədər uzanan yerin maqnit sahəsinin azaldığı böyük bir ərazidir. O, planetin kosmik radiasiyadan qorunmasını zəiflədir və oradan keçən peyklərin normal işləməsini təhlükə altına qoyur.
