Zəngdən əvvəl oyanmaq vərdişi zərərsiz görünə bilər, lakin bəzi hallarda bu, qalxanvari vəzin hormonlarının həddindən artıq istehsalına işarə edir.
Oxu.Az bildirir ki, bu barədə gazeta.ru-ya rusiyalı terapevt Ulyana Maxova danışıb.
Mütəxəssisin sözlərinə görə, əgər insan mütəmadi olaraq vaxtından xeyli əvvəl oyanır və yenidən yata bilmirsə, bu, hormonal pozğunluqlarla əlaqəli ola bilər.
"Xüsusilə, əgər bu vəziyyət qıcıqlanma, yorğunluq, ürək döyüntüsünün artması, narahatlıq, dəri quruluğu, dırnaq və saçların kövrəkliyi, həmçinin çəki itkisi və bədəndə titrəmə ilə müşayiət olunursa, diqqətli olmaq lazımdır. Bu simptomlar hipertiroidizmin - qalxanvari vəzin həddindən artıq hormon istehsal etdiyi vəziyyətin əlamətləri ola bilər", - deyə ekspert xəbərdarlıq edib.
Maxova orqanizmin təbii xüsusiyyətləri ilə patoloji dəyişikliklər arasında fərq qoymağın vacibliyini vurğulayır.
"İnsanların elə bir kateqoriyası var ki, onların orqanizmi normal qrafikdən daha erkən təbii oyanmağa köklənib. Onlara "torağaylar" deyirlər. Əgər erkən oyanmalar narahatlıqla müşayiət olunmursa, insan gün ərzində özünü gümrah hiss edirsə, səhər yeməyindən əvvəl yüngül aclıq varsa, enerji tez bərpa edilirsə və yeni gün rejiminə asanlıqla uyğunlaşırsa - rejim düzəlişinə ehtiyac yoxdur. Lakin yuxu fasiləli olur və gücü bərpa etmirsə, bu, sağlamlıq problemlərinə işarə edə bilər", - deyə ekspert bildirib.
Həkim qeyd edib ki, yuxu rejiminin pozulması həyat keyfiyyətinə ciddi təsir göstərə bilər - diqqəti və immuniteti zəiflədə, həmçinin stres səviyyəsini artıra bilər.
Qalxanvari vəzin işində pozğunluqdan şübhələndikdə ekspert endokrinoloqa müraciəti təxirə salmamağı məsləhət görür.
Erkən diaqnostika və düzgün müalicə hormonal balansı bərpa etməyə və tam dəyərli yuxunu qaytarmağa kömək edəcək", - deyə Maxova sözlərini yekunlaşdırıb.
